5f1e2a386bc359c73f4b01b3b19636e8

حياتك من صنع إيدك

5f1e2a386bc359c73f4b01b3b19636e8

أنا بنت عاديه جدا من وانا عندي 6 سنين  الناس اللي حوليه إكتشفوا مواهبي اول موهبة اكتشفتها والدتي وهي اني برسم حلو جدا واني بعرف أقلد زي احسن مزور في البلد بس عمري ما زورت طبعا  كانت والدتي الوحيده الي بتشجعني  ولما كبرت شويه  إكتشفت حبي للتمثيل ودخلت مسابقات كتير ونجحت فيها وكنت مشهوره في المدرسه عشان انا صاحبه مقدمه الإذاعة المدرسيه  والأطفال رايحين جايين يقولو (كانت معكم مروة يسري ) , اعتبرت ان دي اجمل سنين حياتي وخاصه بعد منع والدي ليه من اني امثل و ألقي الشعر لوجود عاهات وتقاليد وانا قصده اقول عاهات .

اتمنعت من حاجات كتير بحبها اتمنعت من كل هوياتي حسيت اني مكبوته واني ماليش لازمه حسيت بضعفي لكوني بنت بتاخد الأوامر ولازم تخلي بالها من الناس عشان هي بنت ,ولكن مقدرتش افضل كده مقدرتش أنصاع لقرارات حد حبيت اكون انا.. أكون نفسي .. وفعلا قررت أواجه ..وأول حد واجهته كان والدي التحدي الأكبر بالنسبالي  كنت في الوقت ده في الثانويه العاميه  وأنا قاصده برده كلمه (عاميه ).. قولت لوالدي اللي دايما بيستهين بقدراتي اني لو جبت مجموع كبير أدخل كلية الإعلام ومع مناقشات وزعيق وخبط ورزع  قالي في جمله استهزائيه ده لو جبتي مجموع أساساً هو انتي بتفكري في ايه غير في الرسم والشعر والكلام الفاضي وهنا كان مربط الفرس ,اجتهدت ,تعبت ,ذاكرت ,نمت علي الكتاب , صحيت لاقيتني في اعلام بمجموع يدخلني اي كليه بتمناها , وموقفتش علي كده ده كان بدايه طريق ماشياه …

لتقييم الموضوع يرجى تسجيل الدخول
3 votes, average: 5.00 out of 53 votes, average: 5.00 out of 53 votes, average: 5.00 out of 53 votes, average: 5.00 out of 53 votes, average: 5.00 out of 5 5.00 (3مشترك)
Loading...

عن Marwa Yosry

أضف تعليقاً